طفولتى البلهاء

• طفولتى المتشردة ..بيجى ف بالى لما كانت اى مدرّسة تيجى تدرسلى احبها حب مش طبيعى وافضل ارسم خطط علشان اخليها تطلق علشان لما اكبر اتجوزها .. بيجى فى بالى القلم ابو 4 الوان ومحاولاتى التى باءت بالفشل انى احاول انزل ال 4 الوان مع بعض ... بيجى ف بالى اخواتى ال كانو اصغر منى وكنت دايما اقولهم انتو مش اخواتى واحنا لاقيناكو عند الجامع .. بيجى ف بالى العيال ال كانت معايا ف المدرسة وتيجى تدوس على الكوتش الابيض بتاعى نوع يعنى من خفة دم اهاليهم... بيجى ف بالى لما كنا نسيب المدرس بيشرح انا وصحابى ونقعد نعد ف كل الموجودين ونشوف المدرس بياخد كام من كل واحد ف الشهر علشان نحسب السبوبه ال بيعملها من الطلبة .. بفتكر لجنة الامتحان لاول مره والعرق بيشر وتدخل تقرا قرآن وادعيه وتطلع البرشام .. بفتكر الزرار ال بيسحب سلك المكنسة . كنت طول اليوم اطلع السلك وايدى ع الزرارو اسحبه وهكذا لحد ما اخد العلقة التمام .. كلمة عمرى ما هنساها لما كنت اجى استلف من واحد ورقة. معلش اصل كشكولى معدى النص..والمدرس الغلس ال كان بيكرهك علشان مبتخدش درسه عنده.. وسوبر ماريو والمسدس ال كنت بنشنه ع التلفزيون علشان اصطاد الحمام والفراخ..,ولما حد من البيت يبعتنى اشترى حاجه واضرب الباقى واقولهم انها غليت .. وافتكر كمان فيلم Toy Story ومن بعدها ممسكتش لعبة بسبب كمية الرعب ال حصلتلى .. والقشر بتاع اليوستفنى لما كنت تعصره ف وش اصحابك.. ومعاناتى عند الحلاق  ......... كل ال فات حمادة وصورك وانت طفل مع اصحابك حماده تانى .. يعنى يبقى ليك ذكريات حلوه فشخ وصور وحشه فشخ بتضيع كل لحظه حلوه.

Follow @Moouussaa